Tuesday, February 21, 2017

ඕලන්දයේ පුංචි අයගේ පාසල



මම පුංචි කාලේ  පාසල් තේරීම කියන්නේ යුද්ධයක් හා සමානයි. මගේ මවත් පියත් පාසල් ගැන දැරූ මතය නිසා එවන් යුද්ධයකට මාව   අසු  නොවුනද අසු  වුනු  අය අප්‍රමාණය. රාජකීය ,විශාකා , සිරිමාවෝ , ආනන්ද ,නාලන්ද , තරඟයට  ඉතා ඈතට විහිදෙන ඉතිහාසයක් ඇත. නමුත් ඒ  ලංකාවේදීය. ඕලන්දයේ පාසල් ක්‍රමය ඊට හාත්පසින්ම වෙනස්ය. මෙහි ජනාවාස  අයත් ප්‍රදේශ වැයික්කි යනුවෙන් හඳුන්වති. මෙම වැයික්කියකට පාසල් කීපයක් ඇත ඒ රාජකිය , විශාකා නොව පුංචි දරුවන් කාගේත්  ප්‍රාථමික පාසලයි.

මගේ දියණිය මුල්වරට ගිය ප්‍රාථමික පාසැල
ඕලන්දයේ උපදින සෑම දරුවෙක්ම පාසල් යායුතුමය. මෙම දරුවන්  තමා  ජිවත්වන ප්‍රදේශයේ නිවසට නුදුරු පුංචි පාසලට යන්නේ  වයස අවුරුදු 4 දී. පාසල් යැවීම සම්බන්ධව අදාල තොරතුරු ලිපිය දෙමව්පියන්ට තමා ජිවත්වන නගරශලාවෙන් එවනු ලබන්නේ දරුවාට මාස 24 පිරෙද්දිය. වයස අවුරුදු 4 දී පාසල් යාමට පෙර මාස 24 සපිරුණු දරුවන් සෑම  ප්‍රාථමික පාසලකම ඇති ළදරු පාසලට   යැවිමට දෙමවුපියන්ට පුළුවන. දරුවන් දිවා සුරැකුම් මද්‍යස්ථාන වල සිටී  නම් එම ළදරු පාසල් පෙර පුහුණුව එම ආයතන වලින් දෙනු ලබයි. මොකද්ද ඔවුන් කරන පුහුණු කිරීම? කෑම  බිම ගන්නා  අකාරය, අනිත් දරුවන් සමඟ සහ යෝගයෙන් ගත කිරීමට පුරුදු පුහුණු කිරීම  , පුංචි පුංචි කලාත්මක ක්‍රියාකාරකම් වලට පුහුණු කිරීම, පොටියට  පුරුදු කිරීම , වැසිකිලියක් නියම ආකාරයට පාවිච්චි කිරීමට පුහුණු කිරීම, පාවිච්චි කිරීමෙන් අනතුරුව අත්  සෝදා ගැනීමේ වැදගත්කම කියා  දීම, වැනි කරුණු දරුවාට වැටහෙන අයුරින් ඉතාමත් ඉවසීමෙන් මෙම පෙර පාසල් ගුරුවරු කියාදෙති . දරුවා ඩයපර් නමින් හඳුන්වන චු අමුඩය අතහැර නොමැති නම් එය අත  හැරීම  ද මෙම ගුරුවරු කරයි. නිවසක දෙමාපිය රැකවරණය  යටතේ හැදෙන වැඩෙන දරුවන් පාසල් යාම තරමක විශාල පියවරක් ලෙස මෙහි අධ්‍යාපන අමාත්‍යංශය සලකයි. ඒ නිසා ඊට අදාළ  සියලුම නිසි පියවර රජයේ අනුග්‍රහය ඇතිව සිදුකරයි. එමෙන්ම පාසැල යනු තමා  අධ්‍යාපනය ලබන ආයතනය විනා  පාසලේ නම තමන්ට ආභරණයක් නොවන බව මෙහි දකින්නට ලැබෙන දෙයකි. පාසල් නිළ ඇඳුම් මෙහි නොමැති අතර සෑම ප්‍රථමික පාසලක්ම නම් කරනුයේ එම ප්‍රදේශයේ නමිනි.
ප්‍රාථමික විදුහල් කොටස් 3 යුක්තය 1. විවෘත ප්‍රාථමික ,2. කතෝලික ප්‍රාථමික   සහ ඔමිනියම් ප්‍රාථමික .

විවෘත ප්‍රාථමික : කිසිම ධර්මයක් පිළිබඳව උගන්වනු නොලබයි.  ඕනෑම දරුවෙකුට ඇතුලත් විය හැක.

කතෝලික ප්‍රාථමික : කතෝලික ධර්මය උගන්වනු ලබයි. යාඥා කිරීම කලයුතුය , කතෝලික වීම අත්‍යවශය නොවුනද ඇතුලත් වීමට පහසුය, නමුත් ඕනෙම ආගමක දරුවෙකුව ඇතුලත් කල හැක.

ඔමිනියම් ප්‍රාථමික : කිතුනු දහම , බුදු දහම සහ ඉසලාම් දහම ගැන දරුවන්ට තරමක අවබෝධයක් ලබා දෙයි නමුත් කිසිම ආගමක වත් පිළිවෙත් කිරීමක් නොමැත. 

මාස 24 දී දරුවන් යන ළදරු පාසැල


 ඉහත වර්ග තුනින් තමා  කැමති පාසලකට දරුවාව දමන්නට දෙමාපියන්ට පුළුවන. පෙර පාසලින් ලද පුහුණුවෙන් පසු දරුවා තමා ජිවත්වන ග්‍රාමයේ හෝ නගරයේ තම නිවසට නුදුරු ප්‍රාථමික පාසලට දරුවා යවන්නට දෙමාව්පියන් ලක ලැහැස්ති වෙති. මෙහි පාසල් වසර පටන් ගන්නේ සැප්තැම්බර් මස සිටය. ප්‍රාථමික පාසලකට දරුවෙක් ඇතුලත් කිරීමට පෙර දෙමාපියන්  තමා  අවට පාසල් බැලීමට යති. පාසල් දෙමාපියන්ට පාසල් තුල , සහ ඔවුන්ගේ වැඩ කටයුතු කෙරෙන ආකාරය පිළිබඳව මනා  අවබෝදයක් එම අදාල පාසලේ ප්‍රධානියා ලබා දෙයි.  ඉන් පසු දෙමාපියන්ට තම දරුවාට  පාසලක් තෝරාගත හැකිය. නමුත් මෙම පාසල තම නගරයට අයත් පාසලක් විය යුතුය. වෙනත් නගරයක පාසලකට යැවීමට නම් විශේෂ හේතුවක් තිබිය යුතුය. විශේෂ ආධාර අවශ්‍ය පාසල්, අන්ධ  ගොළු පාසල් , ඔටිස්ටික් පාසල්  සහ ඩවුන් සින්ඩ්‍රම් පාසල් වලට අයත් වන දරුවෙක් නම් නගරශාලාවේ අනුමැතිය ඇතිව දරුවාව එම පාසලකට යවන්නට පුළුවන.  දරුවා පාසලට නම  ඇතුලත් කල පසු පාසලින් දරුවට පිළිගැනීමේ ලිපියක් , ගුරුතුමියගේ නම , සහ කෑම  පෙට්ටියක් සහ පාසලේ නම සහිත රෙදි මල්ලක්  සහ ටි ෂර්ට් එකක් තැපැලින්  එවනු ලබයි. සැම  ප්‍රථමික පාසලක්ම පලවෙනි වසර උදැසන 08:30 ට පටන් ගන්නා  අතර 08:15 සිට 08:20 දක්වා කාලය දරුවාව පාසලට ඇරලවන්නට පුළුවන. නමුත් පාසල් පටන්ගන්නා  වෙලාව නිවාඩු කාල  නගරයෙන් නගරයට වෙනස්වන අතර පාසල් නිවාඩු කාල එකම කාලය තුල සිදු වන්නේ නැත. ප්‍රාන්තයෙන් ප්‍රාන්තයට මෙය වෙනස්ය. පළමු වසර පළමු මාස  තුන දහවල් 12:30 දක්වා දරුවා පාසල් යන අතර ක්‍රමානුකුලව මෙම වෙලාව දහවල් 15:30 දක්වා වැඩි කරනු ලබයි. සමහරක් ප්‍රාථමික  පාසල් වල දරුවන් කෑම  පැයේදී ගෙදර ගෙනවිත් කවා  පෝවා  නැවත ගෙනගිය හැක. නොඑසේ නම් කුඩා මුදලක් පාසලට ගෙවීමද , දිවා  කාලයට නිවසට යා  නොහැකි දරුවන්ව බලාකියාගන්න පාසල තුලම ඇති ආයතනයකට දරුවා භාර කල හැක . එම ආයතන දහවල් කෑම පැයේ බලාගන්නා  ආයතන (Tussen de middag opvang/ Lunch time care)  නමින් හඳුන්වයි. මෙම ආයතන නිවසට යාමට නොහැකි දරුවන් සඳහා දිවා  ආහාරය සපයයි, මෙම ආහාරය දවසින් දවස වෙනස්ය. නමුත් පෝෂ්‍ය අහාර  වේලක් දීමට ඔවුන් සෑම  විටකම උත්සහ  කරයි.

පලවෙනි ශ්‍රේණියේ ඇතුලත

මෙම ප්‍රථමික පාසල් 1 ශ්‍රේණියේ සිට 8 ශ්‍රේණිය දක්වා පමණි. මෙම කාලය තුල දරුවා ගණිතය ,භාෂාව ,ජ්‍යාමිතිය , විද්‍යාව , කළමනාකරණය , සහ පරිපාලනය සම්බන්ධව ලිහිල් ක්‍රමයට ඉගෙන ගනී. විද්යා විෂයන් තුලින් ලිංගික අධ්‍යාපනය ලබා දෙන අතර සමාජ රෝග ගැන දරුවන්ට මනා  අවබෝධයක් ලබාදෙයි.
 මෙහි දරුවන් පිහිනීම අනිවාර්යෙන්ම කලයුතුය. එය පාසැල තුලින් ලබා නොදුන්නද රජයේ පුහුණු තටකයෙන් මෙම පිහිනීමේ ඩිප්ලෝමාව ලබාගත හැක. මෙම පිහිනුම් පාඨමාලාව කොටස් 3 යුක්තය. පිහිනුම් ඩිප්ලෝමා ඒ . තමාට දියට වැටුනොත් නොගිලි සිටීමට පුළුවන, ඩිප්ලෝමා  බි. තමා  දියට වැටුනහොත් නොගිලී ගොඩට පිහිනන්නට හැක. ඩිප්ලෝමා  සි . තමා  දියට වැටුනොත් තමා ගේත් තම සගයාගේත් පන බේරාගෙන ගොඩට පිහිනීමේ හැකියාව ඇත. සම ප්‍රාථමික පාසලක්ම සතියට දවස් දෙකක් ක්‍රීඩා පුහුණුව දරුවන්ට ලබාදෙයි. ඒ සඳහා ක්‍රීඩා ඇඳුම් ,සපත්තු බෑගයක දමා සඳුදට   පාසලට යවන අතර සිකුරාදාට නැවත නිවසට ගෙන එනු ලබයි.

ප්‍රාථමික පාසැල කොටස් තුනකින් සමන්විතය, එනම් 1,2,3 ශ්‍රේණි පුංචි බිල්ඩිම, 4,5,6, ශ්‍රේණි මධ්‍යම බිල්ඩිම,සහ 7,8 ශ්‍රේණි උසස් බිල්ඩිම යනුවෙනි.

ගුරුතුමියක් දරුවන්ට පැහැදිලි කරයි

1,2,3 ශ්‍රේණි සඳහා ඔවුනටම වෙන් වුනු ලෝකයක් ඇත , බොහොමයක් පාසල් මෙම අංශය කුඩා සුරංගනා  කතා ජීවමාන කරයි. දරුවන් කුමරකුමරියන් විදිහට ඇඳුම් ඇඳ  පාසලට පැමිණෙති. පන්ති කාමරය තුල සෙල්ලම් ගෙයක් , මාලිගාවක් වැනි දෙයක් අනිවාර්යෙන්ම ඇත. එමෙන්ම පුක් හෝ මින්ක් නම්වූ රෙදි බෝනික්කෝ දෙන්නෙක් මෙම පුංචි බිල්ඩිම තුල සැම  පන්තියකම ඇත. මෙම බෝනික්කෝ දරුවන් සමඟ නිවාඩුවක් ගත කිරීමට පැමිණෙයි. ඒ පැමිණෙන්නේ සුට්කේස් එකක් සමඟිනි.

පුක් දරුවෙක් සමඟ යන්නට සුදානමින්
  ඒ සුට්කෙසය තුල මේ බෝනික්කට රැ  ඇඳුමක් , අමතර යට ඇඳුමක්,සපත්තු දෙකක්, දත් බුරුසුවක් , දත්බෙහෙත් , පනාවක්, සහ වැඩ පොතක් ඇත. වැඩ පොතේ ඇති පුංචි පුංචි වැඩ දරුවා මේ බෝනික්කා  සමඟ කලයුතුය. මගේ දියණිය කුඩා කල ඇය  ට ලැබුණු වැඩ පොතේ තිබුනේ , කඩේ ගොස් කෙසෙල් ගෙඩි දෙකක් මිලදී ගෙන එකක් බෝනික්කට කන්න දී තමන් කාල  ඉවර වුනු පසු කෙසෙල් ගෙඩි දෙකේ ගණන කියද  කියා පොතේ ලිවිම. තමාගේ ප්‍රියතම අහාරය බෝනික්කට රස බලන්න දීම , එය හදන අකාරය ලිවිම. මිට අමතරව සැම  ක්‍රියාකාරකමක්ම පිංතුර ගෙන බෝනික්කාගේ දින පොතේ ඇමිනිය  යුතුය.   මෙම අංශයේ බොහෝ විට විවිධ ක්‍රියාවන් ජීවමානවම  කරයි. මෙම පන්ති වලදී ගුරුවරුන් දරුවන්ගේ හැකියාවන් තේරුම් ගන්නා  අතර ඔවුන්ගේ අඩිතාලම 3 පංතියේදී දමනු ලබයි. 3 පංතියේ සිට දරුවන් ඉගෙනීමට යොමු කරවයි. පුංචි පාසල්  වල බොහොමයක් පංති  විවිධාකාර නම් වලින් හඳුන්වති මෙම නම් එක්කෝ රටක නමක් , ප්‍රාන්තයක නමක් , නොඑසේ නම් ආදිවාසීන්ගේ නමක් නියෝජනය  කරයි.
 4,5,6 පන්ති වලදී දරුවන් තරමක් ගැඹුරින් සියල්ලම හදාරා බලන අතර , අධ්‍යාපනික චාරිකා බහුල වකවානුවකි. එමෙන්ම දරුවන්ට ජීවමාන අතදැකීම්  ලබාදෙයි. සතුන් සමඟ වැඩ කිරීම, වගා කිරීම වැනි සියල්ල දරුවන් අත්දැකීම් ලබා ගනී.පවුල් සහජීවනය යන තේමාව ඔස්සේ රජයේ වෛද්‍ය වරු ලිංගික අධ්‍යාපනය ලබා දෙන්නේ මෙම කාලය තුලදීය. නමුත් එය ජීවමාන අත්හදාබලිමකින් තොරය. 

පලවෙනි ශ්‍රේණියේ ඇති සෙල්ලම් නිවස


7,.8 පති වලදී මෙම දරුවන් මධ්‍යම පාසලට යැවීම සුදානම් කරයි. මෙම පාසල් කාලය තුල සෑම දරුවෙක්ම සිටෝ නම් රජයේ විභාගය වසරකට 3 වරක් ලියන අතර එයින් ලබන ලකුණු ප්‍රමාණය අනුව දරුවාගේ අනාගතය තීරණය වෙයි. යම් දරුවෙකුට අමතර උදව් අවශ්‍ය නම් එයද පාසලින් ලබා දෙයි. මෙහි ටියුෂන් පංති හෝ ශිෂ්‍යත්ව විභාග නොමැත. සුපිරි පාසල් තරඟයක්ද නොමැත
පාසැල තුල ඇති ක්‍රීඩාගාරය 


 සුරී -නෙදර්ලන්තය 
 පිංතුර වල අයිතිය මගේ  දියණියගේ  පාසැල සතුය

Monday, February 13, 2017

වැලන්ටයින් උත්තමයා සහ වෙළඳ බඩගෝස්තරවාදය!




වැලන්ටයින් දිනය ඉතිහාසයේ  විවධ ආකාරයෙන් ලියවී ඇති නමුදු අද පවතින වැලන්ටයින් දිනය මෙයයි යන්න හරියටම සාක්ෂි නොමැති බව පැහැදිලි කරුණකි. ඉතිහාස ගත කරුණු අනුව මෙය ශාන්ත වැලන්ටයින් තුමා සිහිපත් කිරීමේ කතෝලික  නිවාඩු දිනයක් වුවද  මෙම ශාන්තුවරයා කාඩ් ,,මල් පොකුරු යැවීමට සම්බන්ධ විම නම් විහිළුවක්  සේම එයට කිසිම සක්ෂියක්ද නැත.  අතීතය කෙසේ වෙතත් මම ජිවත් වන නෙදර්ලන්තේ මෙතුවක් කල් පුරාවට මම  දැකපු වැලන්ටයින් සිද්ධීන් කිහිපයක් සහ අත්විඳි සිද්ධීන්  මගේ හදවතට  ගෙන දෙන්නේ සොම්නසක් මදහසක් සහ කලකිරීමක්..  


මල් නෙදර්ලන්තය පුරාවට දිදුලන දෙයකි. මල් නම් ඕලන්දය ඕලන්දය නම් මල් බස් වහරේ පවතින්නේ එලෙසය. ජාතික විජාතික කාගේත් ඉල්ලීම  රටට ආවේනික ටියුලිප් මලය. එහෙත් පෙබරවාරි මස මෙම ඉල්ලුම බිංදුවට බසී. ගෙවල වැට  අයිනේ පැල වෙන කවුරුත් වැඩි තැකීමක් නොකරන රතු රෝස මල මුළු රටම නතු කර ගන්නේ නිරායාසයෙනි.  ඉයුරෝ 2.50 ගන්නට පුළුවන් මේ මල ඉයුරෝ 25 දක්වා පෙබරවාරි මස   මුල සතියේ ඉහල යයි. සුභ පැතුමත්   එසේය ශත .50 සුභ පැතුම  ඉයුරෝ 4.50 දක්වා ඉහල යයි නොඑසේ නම් ඊටත් වැඩිය. අවන්හල් වල තත්වය ඊටත් අන්තය. බඩගින්නට  කෑම  වේලක් කන්නට අවන්හල් වල මෙදිනට ඉඩ නැත.  එදිනට අවන් හලකින් කන්න නම් මාස  ගණන් පෙරාතුව මේසයක් වෙන් කරගත් යුතුය. බහුතරයක් එසේ කරන්නෝ වෙති.කවදත් කන පාන්  ගෙඩිය ගන්නා  බෙකරියද ඊට දෙවැනි නැත. මේ කාලය තුල විශේෂ පාන්  බිහි වෙති. ඒ වැලන්ටයින් පාන් ය. එකම වෙනස පාන්  ගෙඩිය තුල රෝස පාට  අයිසින් තලියක් තිබීමය. එය අනිත් පාන් වලටවඩා  මිල  අධිකය. කල් තබා ගැනීමට  වත්  නොහැකිය.  සාමාන්‍යයෙන් අපි සතියට බඩු     ගන්නා  සුපර් මාර්කට් එකෙත් ඔය සින්දුවමය. හැම එලවලුවක්ම හදවත් සහිත සෙලොපෙන් නම් කොළ වල ඔතයි. නිකම්ම නිකම් තක්කාලි එදාට වැලන්ටයින් තක්කාලිය ඒවගේම මිලත් අධිකය.

 වැලන්ටයින් උත්තමයා  සිහි කිරීම කෙසේ වෙතත් අද වැලන්ටයින් දිනයේ තත්ත්වය එයයි. දැනට වසර ගණනක සිට පෙබරවාරි මස ඉතා සීතලය ඒත්  බෝට්ටු සවාරි කාරයෝ ලස්සන බැලුම් වලින් බෝට්ටු සරසා දෙගුණයක් මිල අය කරති. හෝටල් වල වැලන්ටයින් කාමර හදති  , රතුපාට තිර රෙදි, ඇඳ  රෙදි දමා  ලස්සන මල් පොකුරු තබා තුට්ටු දෙකේ චොකලට් පෙති රතු පාට පිරිසියක තබා , හම්පඩ කාමර මනරම්ව  සරසා වැලන්ටයින් සුයිට් යනුවෙන් නම් කර තෙගුණයක මිලට එක රැයකට  විකුණති. කෙටින්ම කියතොත් වැලන්ටයින්  මේනියාව   දෛනික ජිවිතයේ සියලුම අංග නතු කරගනී. ලදරුවාගේ චු පැම්පරයේ  පවා I love you සඳහන් කර මිල වැඩි කර විකුණති. වෙළෙන්දා  කොපමන පරිභෝගියකයාව ගසාකන්නේද යන්න තේරුම් ගැනීමට සමහර අයට  මෙතරම් අපහසු මන්ද යන්න මට නම් ප්‍රහේලිකාවකි.


 


 


 


 


පිට රට වල ජිවත් වීමට යන්නට පෙර මට වැලන්ටයින් ගැන තිබුණු දැනීමක් නැත. මට තිබුණූ  අත්දැකීම්  නම් පාසල් නේවාසිකාගාරයේ සිටින කාලයේ එම නේවාසිකාගාරයේම නවාතැන් ගත්   අක්ක කෙනෙකුට දෙන්න යයි කියා අසල්වැසි පාසලේ අය්යා  කෙනෙක්  මගේ අතට දුන් පොත තුල තිබුණු චොක්ලට් එක ගිල දමා  අදාල අක්කාට  පොත ගෙනිහින් දීම. අදටත් මගේ මුහුණට මදහසක් ගෙන දෙන ඒ වැලන්ටයින් සිදුවීම වැනි දෑ ය නො එසේනම් නම් ජැක්සන් ඇන්තනි මහතා ගයපු  වේදිකා නාට්‍යක ගීතයකි වැලන්ටයින් උතුමාණනි උඹේ සබුක්කුවෙ පහර කකා  ගත කල මනරම් සොඳුරු දිවිය ඒ ..." ඒ අත්දැකීම් නම් වර්ථමානයේ වැලන්ටයින් අත්දැකීම් වලට වඩා   බෙහෙවින් අහිංසකය. 

නමුත් පසුකාලීනව සිදුවූ යම් යම් සිදුවීම් හමුවේ වැලන්ටයින් දිනය ගැන මට ඇති වුයේ කලකිරීමකි. එදා 2005 වසරේ පෙබරවාරි මස 14 දින බෙල්ජියමේ සිට නෙදර්ලන්තය බලා  එන ගමනේ මස 3 ක් වයස මගේ පුංචි දියණිය සමග අපි වහනය මග නතර කලේ බඩගින්නට යමක් අනුභව කරන්නට නමුත් අප ගිය සැම  අවනහල්ක්ම කියා සිටියේ ඔවුන් සම්පුර්ණයෙන්ම පිරි ඇති බවයි. පොඩි පැටික්කිට  කෑම  මම ළඟ තිබුණු නිසාවෙන් අප කවුරුත් සැනසීමට පත් වුණ  නමුත් යකෙක් කන්න තරම් තිබු බඩගින්න නම් යටපත් කරන්නට ඒ සැනසීමට පුළුවන් වුනේ නෑ . අවසානයේදී පැට්‍රොල් හලකින් අපි යන්තම්  පාන් කැබැල්ලක් ගිල දමා  තේ කෝප්පයක් බී  තෙගුණයක බිලක් ගෙවා දමා  නිවසට ආවෙමු.


 වැලන්ටයින් උත්තමයා  නියම උත්තමයෙක් විය හැක එහෙත් අද කාලයේ සිදුවන්නේ ආදරය සැමරීම කෙසේවෙතත් කුට වෙළඳුන්ගේ තක්කඩි වෙළඳ උපායන්  වලට අපි  නතු වීමයි. දල වශයෙන් මිලියන 14 සුපතුම්පත් ද , මිලියන 10 රතුරෝස මල් ද , මිලියන 9 පුළුන් වැලන්ටයින් වල්ස්සුද , මිලියන 14.5  වැලන්ටයින් චොකලට් ද නෙදර්ලන්තයේ පමණක්  මෙම පෙබරවාරි මුල සතිය තුල අලෙවි වන බව සංගණන වාර්තා සැපයුම් අංශ පවසයි.

 

 


කවුරුත් උමතුවෙන් මෙන් හැසිරෙන වැලන්ටයින් දිනය ගැන මගේ සැමියා දරන්නේ අමුතුම මතයකි. ඔහුගේම වචන වලින් කිවහොත් මමත් දරුවත් සමඟ ගත කරන  සැම  මොහොතක්ම වැලන්ටයින් මොහොතකි, මම  අතින් ඉවෙන බොජුන වැලන්ටයින් බෝජුනකි. පවුලම එකට ගත කරන නිවාඩුව වැලන්ටයින් නිවාඩුවකි . ඔහුට පෙබරවාරි 14 තවත් එක දවසක් පමණි. ඔහුට නම් වැලන්ටයින් යනු වෙළඳ උමතුවකි ගසා කෑමකි කථාව  සත්‍යය.එය එසේ නොවේ යයි කියන්න මගේ අත්දැකීම් තුලින්ද අපහසුය. මුදල දෙවියා  කොටගත් ලොවක එය එසේ නොවුනහොත් උදාවන හිරු බස්නාහිරින් නැග  එනු ඇත. ජනවාරි මස තුන්වන සතියේ ඔහු සති තුනකටම නිවසට  අවශ්‍ය දෑ මිලදී ගන්නේ මෙම උමතුව මගහැරිමටය. වාද  විවාධ  නොමැති පවුලක් නොමැත, එය එසේ වෙන්නට නම් ඔවුන් කනත්තේ සමාදානයේ සැතපෙන පවුලක් විය යුතුය. වසරකට එක දිනක් පමණක් තම බිරිඳගේ හෝ සැමියාගේ ආදරයෙන් වැඩක් ඇතිද එය තීරණය කිරීමට අපි වෙළෙන්දෙකුට භාර  කරමුද යන්න ඔබට භාරය.


පිංතුර අන්තර්ජාලයෙන් 

සූරී - නෙදර්ලන්තය